妙齡北方佳麗係兩個朋友陪同底下，一跪一痞咁終於行到嚟Counter。佢好肚痛要睇醫生。睇完之後要送院治理。等緊㗎白車黎嘅時候，佢繼續痞喺地下，話咁樣最舒服，坐唔到沙發。一路就嗌生嗌死好似攞佢命咁。
當三位白車哥哥入嚟，呀佳麗要幾個猛男附住先上到救護床。神奇嘅係，佢抬頭一望幾位靚仔，佢即刻可以含情脈脈咁對住人哋笑。一剎那所有嘅痛楚都拋諸腦後。
佢身旁嗰兩位朋友仲想幫佢影相，哥哥仔話：「快啲行啦！一路行一路影啦！」果然見慣世面！
佳麗仲問可唔可以用被遮住個頭，包住唔想俾人見到。哥哥仔氣定神閑話：「冇人會望你㗎！」
笑咗～
～～～
外籍少女上個禮拜黎話飲大咗要嘔，要攞止嘔丸。
隔左十幾日嘅某個禮拜一佢又返嚟。佢話禮拜六凌晨三點食粒止嘔丸，瞓咗10幾個鐘，下晝五點先醒。中間有一堂好好好好緊要嘅冇去上到。想今日攞返假紙。
佢賴話冇人同佢講過眼瞓藥唔好凌晨三點先食。又賴我哋禮拜六下晝唔開門，搞到佢冇醫生睇，好似全香港得我哋一間診所咁。
大佬，我點知你冇common sense ？你啲藥唔識食，唔該你臨走嘅時候叫姑娘教你點食。邊有人咁聰明眼瞓嘅藥留到凌晨三點食？我駛唔駛問埋你識唔識得攞隻杯，倒水落隻杯，擘開個口，張粒藥擺落個口到，再飲啖水吞落肚呢？
同埋假紙冇得後補好唔好？
～～～
上個禮拜幫孖B打左3支疫苗🤣🤣🤣🤣
Search